बौनियाँ । कैलालीको बर्दगोरिया गाउँपालिकामा जिल्ला स्तरीय अन्तर माध्यामिक विद्यालय छात्र/छात्रा फुटबल प्रतियोगिता हुने भएको छ ।
बर्दगोरिया स्पोर्टस एण्ड इभेन्टसको आयोजनामा मङ्सिर २१ गते देखि उक्त जिल्ला स्तरीय अन्तर माध्यामिक विद्यालय छात्र / छात्रा फुटबल प्रतियोगिता हुने भएको आयोजक बर्दगोरिया स्पोर्टस एण्ड इभेन्टसका अध्यक्ष प्रमोद मल्लले नौलो प्रेसलाई जानकारी दिएका छन ।
विगत लामो समय देखि विभिन्न खेलकुद प्रतियोगिता आयोजना गर्दै आएको उक्त संस्थाले यस वर्ष पनि मङ्सिर २१ गते देखि मङ्सिर २८ गते सम्म उक्त जिल्ला स्तरीय अन्तर मा।वि। विद्यालय छात्र / छात्रा फुटबल प्रतियोगिता गर्न लागेको हो ।
प्रतियोगितामा प्रथम हुने टिमले नगद रु. ५१ हजार, ट्रफी, मेडल र प्रमाण पत्र पुरस्कार स्वरूप प्राप्त गर्ने छ । यस्तै द्धितिय हुने टिमले नगद रु. ३१ हजार, ट्रफी, मेडल र प्रमाण पत्र प्राप्त गर्ने छ, भने प्रतियोगिताको उत्कृष्ट खेलाडीले नगद रु। ५ हजार ५ सय प्राप्त गर्नेछ ।
यस्तै प्रतियोगितामा सबै भन्दा बढी गोल गर्ने खेलाडी, उत्कृष्ट डिफेन्डर, उत्कृष्ट प्लेयर अफ द टुर्नामेन्ट, उत्कृष्ट सर्वाधिक गोलकर्ता, उदयमान खेलाडीलाई क्रमशः नगद रु. ३ हजार १ सय रुपैयाँ प्रदान गरिने आयोजकले जनाएको छ ।
सोही प्रतियोगिताको दोस्रो चरणका खेलहरुमा म्यान अफ द म्याच हुने खेलाडी लाई नगद रु. ५ सय रुपैयाँ प्रदान गरिने भएको छ ।
उल्लेखित उक्त पुरस्कार छात्र तथा छात्रा दुवै टिममा लागु रहेको समेत आयोजक बर्दगोरिया स्पोर्टस एण्ड इभेन्टसका अध्यक्ष प्रमोद मल्लले जानकारी दिएका छन ।
